نتيجة التصويت الأول

السلام عليكم

بعد انتهاء التصويت اللي على الجانب الأيمن .. و اللي كانت نتيجته كالآتي

8 أفراد بيقولوا أيوه نقطع العلاقات ما بينا عشان نرتاح و ناخد حقنا

36 فرد بيقولوا لأ طبعا مينفعش نقطع العلاقات ما بيننا ..

4 بيقولوا مش عارفين بصراحة دا هيحل حاجة ولا لأ

العدد الكلي للتصويت 48 فرد منهم مصريين و جزائريين و من بلاد مختلفة أخرى

طبعا دي مش نسبة تقاس بيها بس يكفينا إن في حد اهتم و شارك بالتصويت عشان نقدر نكلم الناس كلها و نقول لهم لأ يا جماعة .. الموضوع مش بالسهولة دي

أولا: أحب أشكر فعلا أصحاب كلمة لأ .. إللي رفضوا قطع العلاقات بيننا .. إحنا علاقتنا ببعض مش مجرد بلدين عربيين و انتهت المهمة على كده .. لكن علاقتنا أكبر من كده بكتير أوى .. علاقة أخوة .. ممكن الأخوات يتخانقوا مع بعض .. ياخدوا حقوق بعض .. بس هيفضلوا إخوة مهما عملوا و مهما قالوا للناس كلها .. و البلدين في نظر كل الناس إخوة و كيان واحد

ثانيا: أصحاب كلمة أيوه .. و إللي وافقوا على المقاطعة .. أحب أقولكم إن بجد دا مش الحل تماما .. لإن المقاطعة معناها الفرقة و البعد و الهجر .. و دا منقدرش نعمله بين شعبين علاقتهم حميمة ببعض أوى زي مصر و الجزائر .. كان الإمام محمد الغزالي بيقول .. نصر هذه الأمة هيجي من بلد من أربع بلدان .. منهم مصر و الجزائر .. هل يعقل إن النصر يجي من أمة متفرقة .. طب أكيد لو النصر جه من واحدة فيهم يبقى التانية بتساند و بتعاون و وقفة مع أختها تساعدها و تقويها

ثالثا: أصحاب كلمة لا أدري .. لازم تاخدوا وقفة مع نفسكم لبضع ثواني مش أكتر .. ثواني قليلة تفكروا فيها .. و تاخدوا موقف واضح و تنظروا للموضوع من كل جوانبه .. الموضوع مش قضية و انتهت .. القضية دي هنفضل فاكرينها لآخر الدهر و هنقولها لأجيالنا عشان يعرفوا أد إيه عصر الفتن إللي اتوجدوا فيه ..

كلمة أخيرة ...

القضية لسه ما انتهتش .. في حاجات كتير أوى اتزرعت في قلوب الشعبين .. لازم ناخد وقفة مع نفسنا أولا ثم المحيط إللي حولينا عشان لو حصلت الفتنة من تاني و اشتعلت إزاي هنقف ضدها و نقول لها لأ .. إحنا أقوى ...